Fottur Vevlingen

Vevlingen er den austlegaste av Batalden øyane. Terrenget på Vevlingen er småkupert med myr, utmark og litt skog.

Turen startar frå Vevlingen kai. Følg grusvegen rett fram omlag 0,5 km. Her tar du av frå grusvegen til venstre og går turstien nordover til Storehågen som er det høgaste punktet 37 moh. Her er det rasteplass med leveggar, benk og turbokkasse. Det er delvis merka og tydeleg sti.

Følg stien vidare nordover, over eit myrområde og opp på ein liten bergrygg mot Klovvågen, lengst nord på øya. Herifrå ser du over sundet til Hellersøya, der har Florø Båtforening ei uthamn. Hellersøya er ikkje landfast med Vevlingen.

Returen til grusvegen og kaia går du ved å følge stien attende på bergryggen og drei vestover ned mot granskogen. Her følger du stien som går sørover langsmed berga i Vågane og etterkvart passerer du ovanfor Vevlingsvatnet. Du kjem etterkvart innatt på stien du starta å gå til Storehågen og grusvegen til bake til kaia.

Hugs å lukke grindane, det er sau på beite.

Sporet på kartet er gått 18.mai 2022 som ein rundtur.

God tur!